உயிரியல்
கட்டற்ற கலைக்களஞ்சியமான விக்கிப்பீடியாவில் இருந்து.
பின்வரும் தலைப்பின் பகுதியாகும் |
அறிவியல் |
---|
பொருளடக்கம்
உயிரியலின் வரலாறு
நவீன உயிரியல் ஒப்பீட்டளவில் சமீபத்திய வளர்ச்சி அடைந்து இருப்பினும் உயிரியலை உள்ளடக்கியதும் அதனுடன் தொடர்பானதுமான விஞ்ஞானம் ஆதி காலத்திலிருந்தே கற்கப்பட்டது. இயற்கை தத்துவம் மொசப்பத்தேமிய, எகிப்திய, சிந்துவெளி மற்றும் சீன நாகரிகங்களில் இருந்தே கற்கப்பட்டது. இருப்பினும், நவீன உயிரியல் மற்றும் இயற்கை ஆய்வு, அதன் அணுகுமுறை தோற்றம் என்பன பெரும்பாலும் பண்டைய கிரேக்க தத்துவங்களை ஒத்து காணப்படுகின்றன. அதேவேளை மருத்துவ முறையான கல்வி Hippocrates காலம் (கி.மு.460-கி.மு.370) வரை பின்னோக்கி செல்கிறது. அரிஸ்டாடில் உயிரியல் வளர்ச்சிக்கு மிக அதிகமாக பங்களித்தார்.மத்திய இசுலாமிய உலக அறிஞர்களான al-Jahiz (781–869), Al-Dinawari (828–896) போன்றோர் தாவரவியல் பற்றியும் , Rhazes (865–925) உடற்கூறியல் மற்றும் உடலியங்கியல் பற்றியும் நூல்களை எழுதினர். குறிப்பாக கிரேக்க தத்துவஞானி மரபுகளை ஆய்வு செய்த இஸ்லாமிய அறிஞர்களால் மருத்துவம் சிறப்பாக கற்கப்பட்டது. ஆன்டன் வான் லியூவன்ஹூக் (Antony van Leeuwenhoek) நுண்ணோக்கியை மேம்படுத்திய பின் உயிரியல் விரைவில் அபிவிருத்தியடைய மற்றும் வளர தொடங்கியது. இதன் பின்னரே விந்தணுக்கள், பாக்டீரியா போன்றவையும் நுணுக்குக்காட்டிக்குரிய அங்கிகளின் பாகுபாடும் கண்டுபிடிக்கப்பட்டன. நுண் நோக்கியியல் முன்னேற்றங்கள் உயிரியல் சிந்தனையில் மேலும் ஒரு ஆழமான தாக்கத்தை ஏற்படுத்தியன.
19 ஆம் நூற்றாண்டின் முற்பகுதியில் உயிரியலாளர்கள் பலர் கலத்தின் முக்கியத்துவத்தை சுட்டிக்காட்டினர். 1838 மற்றும் 1839 இல், ச்செல்டியன் மற்றும் சுவான் பின்வரும் கருத்துக்களை ஊக்குவிக்க தொடங்கினர். 1) உயிரினங்களின் அடிப்படை அலகு கலம் ஆகும் 2) தனிப்பட்ட கலங்களில் வாழ்வின் அனைத்து பண்புகள் உண்டு 3) அனைத்து கலங்கள் மற்ற கலங்களின் பிரிவில் இருந்தே வரும் இவை பின்னர் கலக்கொள்கை ஆக ஏற்றுக்கொள்ளப்பட்டன .
உயிரியல் பற்றிய நோக்கு
உயிரியல் ஒரு பரந்த அளவிலான, தனித்தனித் துறைகளாகக் கருதப்படுகின்ற, பல்வேறு கல்வித் துறைகளை உள்ளடக்கிய ஒன்றாகும். அவையனைத்தும் ஒட்டுமொத்தமாக பரந்த மட்டங்களில் உயிரினங்கள் பற்றியும், அவை வாழும் சூழல் பற்றியும் ஆய்வு செய்கின்றன:- மூலக்கூற்று மட்டத்திலான உயிரியல் குறித்த ஆய்வு மூலக்கூற்று உயிரியல்
- உயிரணுக்களைப் பற்றிய அறிவியல் உயிரணு உயிரியல்
- உயிரினங்களின் உடலின் அமைப்புப் பற்றிய கற்கை உடற்கூற்றியல், அதுவே இழையங்கள் மட்டத்தில் இழையவியல்
- உயிரிகளில் இழையம், உறுப்புக்கள், உறுப்புக்கள் இணைந்த தொகுதிகள் ஆகியவற்றில் நிகழும் இயற்பியல், வேதியியல் தொழிற்பாடுகள் பற்றிய அறிவு உடலியங்கியல்
- உயிரினங்களுள் நிகழும் வேதியியல் செயல் முறைகள் பற்றிய கற்கைத்துறை உயிர்வேதியியல்
- தனிப்பட்ட உயிரினத்தின் தோற்றமும், விருத்தியும் (Ontogeny) பற்றிய அறிவு விருத்தி உயிரியல் (Developemental Biology)
- பெற்றோர், சந்ததிக்கு இடையிலான பரம்பரைத் தொடர்புகள் பற்றிய அறிவு மரபியல்
- விலங்குகளின் நடத்தைகள் பற்றிய அறிவு நடத்தையியல்
- முழு சனத்தொகை மட்டத்தில் சனத்தொகை மரபியல் ஊடாகவும்,
- பல்வகை உயிரினங்களில், பல தலைமுறைகளூடாக ஏற்பட்ட மாற்றங்கள் பரிணாம உயிரியல், அதன் மூலமாக உயிரினங்கள் வகைப்படுத்தப்படல் உயிரியல் வகைப்பாடு
- பூமிக்கு அப்பாலுள்ள உயிர்கள் மட்டத்தில், Xenobiology
நவீன உயிரியலின் அடிப்படைகள்
உயிரியலில் பல கொள்கைகள் இருந்தாலும், நவீன உயிரியலுக்கு அடிப்படையாக முக்கியமான ஐந்து கொள்கைகள் கருதப்படுகின்றன:[3]- கலக்கொள்கை - கலங்களுடன் தொடர்புடைய சகல கற்கைகளும் கலக்கொள்கையில் அடங்கும். சகல உயிரினங்களும் ஒன்று அல்லது ஒன்றுக்கு மேற்பட்ட கலங்களைக் கொண்டிருக்கும். உயிரிகளின் கட்டமைப்பு ரீதியானதும் தொழிற்பாட்டு ரீதியானதுமான அடிப்படை அலகு கலமாகும். சகல கலங்களும் முதலுள்ள கலங்களிலிருந்தே தோன்றும்.
- படிவளர்ச்சிக் கொள்கை - மரபணுவில் ஏற்படும் மாற்றங்களாலும், இயற்கைத் தேர்வினாலும், ஒரு சனத்தொகையினது பரம்பரைக் குணவியல்புகள் தலைமுறைக்குத் தலைமுறை மாற்றமடையும். இதனால் புதிய இனங்களும், பரம்பரையாகக் கடத்தப்படக்கூடிய இயல்புகளும் உருவாகின்றன.
- சக்தி - அனைத்து உயிரினங்களினதும் நிலைப்பாட்டிற்கு சக்தியானது தேவைப்படுகின்றது. அந்த சக்தியை ஒரு வடிவத்தில் உள்ளெடுத்து, தமக்குத் தேவையான வடிவத்தில் உருமாற்றம் செய்துகொள்ளும் தன்மையை உயிரினங்கள் கொண்டிருக்கின்றன.
- ஒருசீர்த்திடநிலை - அனைத்து உயிரினங்களும் தமது உட்ச்சூழலை நிலையாகவும், மாறாமலும் பேணுவதற்கான சீரமைக்கும் தன்மையைக் கொண்டிருக்கும்.
- மரபணு - மரபணுவே பாரம்பரியத்திற்கான அடிப்படை அலகாகும். ஒரு உயிரினத்தின் குணவியல்புகள் அனைத்தும் டி.என்.ஏ இல் இருக்கும் இந்த மரபணுவிலேயே குறியிடப்பட்டுள்ளது.
உயிரியலில் படிநிலை அமைப்பு
உயிரியல் அமைப்பானது, பல்வேறு படிநிலைகளில் ஒழுங்குபடுத்தப்படுகின்றது. வாழ்வின் மிக அடிப்படையான கூறிலிருந்து, சிக்கலான அமைப்புக்கள்வரை இந்தப் படிநிலைகள் விரிந்து செல்கின்றன. இந்தப் படிநிலைகளில் மிகவும் அடிப்படையான படிநிலையாக அணுவும், மிக உயர்ந்த படியாக சூழலியல் அமைப்பும் இருக்கின்றன.- அணுவின் துணையான பகுதிகள் - இலத்திரன், நியூட்ரோன், புரோட்டோன்
- அணு - மூலகத்தின் இயல்புகளைத் தக்க வைத்திருக்கக்கூடிய, அதன் மிகச் சிறிய அலகு அணுவாகும்.(எ.கா. ஐதரசன் அணு, ஆக்சிசன் அணு.
- மூலக்கூறு - ஒரு தனித்த மூலகத்தினதோ, அல்லது வேறுபட்ட மூலகங்களினதோ இரண்டு அல்லது அதற்கு மேற்பட்ட அணுக்கள் இணைந்து உருவாக்கும் மிகச் சிறிய அலகு மூலக்கூறு ஆகும். எ.கா. இரு ஐதரசன் அணுக்களும் ஒரு ஆக்சிசன் அணுவும் இணைந்து நீர் மூலக்கூறு உருவாகும்.
- பெருமூலக்கூறு - இவ்வாறு பல அணுக்கள் இணைந்து உருவாகும் பெரிய, சார்பில் அதிக மூலக்கூற்று நிறை கொண்ட, சிக்கலான மூலக்கூறுகள் பெருமூலக்கூறு எனப்படும். எ.கா. கருவமிலம், புரதம், காபோவைதரேட்டு, லிப்பிட்
- உயிரணு - பல மூலக்கூறுகள் சேர்ந்து தன்னைத்தானே இனப்பெருக்கம் செய்து வாழக்கூடிய ஒரு சிறிய அலகை உருவாக்கும்போது, அந்த அலகு உயிரணு எனப்படும். உயிரணுவானது தனியாகவோ, அல்லது பல்கல உயிரினங்களின் ஒரு பகுதியாகவோ காணப்பட்டு உயிர்வாழக் கூடிய நிலையில் இருக்கும்.
- இழையம் - ஒரே அமைப்பைக் கொண்ட பல உயிரணுக்கள் ஒரு குறிப்பிட்ட செயற்பாட்டிற்காக ஒன்றாக இணைந்து, ஒரு குழுவாக ஒழுங்குபடுத்தப்பட்டிருக்கும்போது, அது இழையம் எனப்படும். எ.கா. புறவணியிழையம், தசையிழையம்.
- உறுப்பு - சில செயல்களைப் புரிவதற்காக பல வேறுபட்ட இழையங்கள் ஒன்றாக இணைந்து தொழிற்படும்போது, அது உறுப்பு எனப்படும். எ.கா. இதயம், நுரையீரல், கண் போன்ற உறுப்புக்களில் தசையிழையம், நரம்பிழையம் போன்ற வேறுபட்ட பல இழையங்கள் ஒன்றாக இணைந்து தொழிற்படும்.
- தொகுதி - ஒரு குறிப்பிட்ட உடலியக்கச் செயற்பாட்டிற்காக பல உறுப்புக்கள் ஒன்றாக இணைந்து ஒரு குழுவாக இருக்கும்போது அது உடல் தொகுதி எனப்படும். எ.கா. மனிதர்களில் வாய், உணவுக்குழாய் (களம்), இரைப்பை, கணையம், கல்லீரல், பித்தப்பை, சிறுகுடல், பெருங்குடல், மலவாய் (குதம்) போன்ற உறுப்புக்கள் இணைந்து, மனித உடல் தொகுதிகளில் ஒன்றான, உடலின் சமிபாட்டுச் செயல்முறைக்கான சமிபாட்டுத்தொகுதியை உருவாக்கும்.
- உயிரினம் - தனியான உயிரணுவைக் கொண்ட அல்லது பல உயிரணுக்களைக் கொண்ட தனித்து வாழக்கூடிய தனியன் உயிரினம் எனப்படும்.
- மக்கள்தொகை - ஒரு வரையறுக்கப்பட்ட இடத்தில் வாழும் ஒரு குறிப்பிட்ட இனத்தின் குழுவே மக்கள்தொகை எனப்படும்.
- சமூகம் - ஒரு வரையறுக்கப்பட்ட இடத்தில் வாழும் வேறுபட்ட இனங்களின் மக்கள்தொகைகளைக் கூட்டாகச் சேர்த்து சமூகம் எனலாம்.
- சூழல் மண்டலம் - ஒரு வரையறுக்கப்பட்ட இடத்தில் இருக்கும் ஒரு சமூகமும், அது சார்ந்திருக்கும் அனைத்து இயற்பியல் காரணிகளும் இணைந்து சூழல்மண்டலம் எனப்படும். எ.கா. காடு, காட்டில் வாழும் விலங்குகள், தாவரங்கள், அங்கே ஒளி தரும் சூரியன், மண், நீர் அனைத்தும் இணைந்ததே சூழல்மண்டலம்.
- உயிர்க்கோளம் - புவியில் உள்ள அனைத்து சூழல் மண்டலங்களும் இணைந்த தொகுப்பையே உயிர்க்கோளம் என்கின்றோம்.
உயிரியல் கற்கைத் துறைகள்
குருத்தணு ஆராய்ச்சிகளில் மனித நகலெடுப்பதற்கும், நோயாலோ அல்லது காயப்பட்டு சிதைந்து போவதாலோ அழியும் திசுக்களைத் திரும்ப வளரச் செய்வதற்கும், குருத்துத் திசுள்களை உபயோகிப்பதை ஆராய்ந்து வருகிறார்கள்.படங்களின் தொகுப்பு
மேற்கோள்கள்
- Avila, Vernon L. (1995). Biology: Investigating life on earth. Boston: Jones and Bartlett. பக். 11–18. ISBN 0-86720-942-9.
|
No comments:
Post a Comment